Lantegi Batuak fundazioak pabilioi berria zabaldu du Iurretako Ertzilla industrigunean. 5.000 metro koadro dituen eraikinaren erdia, metal eraldaketako zerbitzua ematera bideratuko da, "azken belaunaldiko teknologia" erabiliz. Beste erdia, logistikara bideratuko dute. Lantegi Batuak-ek jakitera eman duenez, erakundeak duen gaitasun industriala eta logistikoa "indartu" dute pabilioi berriagaz. Nabarmendu dutenez, biltegiratze ahalmena 7.500 metro koadrora igo dute. Irabazi asmorik gabeko erakundeak Bizkaian duen 21. zentroa da, eta 1,2 milioi euroko inbertsioa eskatu du. Bertan, 30 pertsonek lan egiten dute, euretariko 25ek desgaitasuna dute.
Bizkaiko Ekonomia diputatu Ainara Basurko eta Oskar Koka alkatea izan dira gaur bertan. Baita Susana Gureña Lantegi Batuak fundazioko presidentea ere. Lantegi Batuak fundazioak industriaren sustapenean jokatutako papera nabarmendu du Basurkok: " Durangaldeko eta Bizkaiko industriaren bultzatzaile moduan funtsezko eragilea zarete. Beste enpresa batzuen zerbitzuetarako eta haien garapenerako oso garrantzitsua da egiten duzuen lana. Gainera, pertsonak erdigunean jarrita". Iurretako alkate Oskar Kokaren berbetan, "Iurretako industria sarea zabaltzea oso garrantzitsua da, bai zerbitzuak eskaintzeko bai herritarrontzako. Bide horretan, Iurretako industri sarea babesten jarraituko dugu".
Bost zentro, Durangaldean
Durangaldean bost zentro ditu Lantegi Batuak fundazioak; euretariko bi Iurretan. Erakundearen logistika guztia dute Iurretan. Beste bi produkzio zentro daude Abadiñon, eta, bosgarrena Zornotzan. Azken horiek eraldaketa metalikoan, eta, mekanizazio eta muntaketetan espezializatuta daude. Lorezaintza eta garbiketa zerbitzuak eskaintzen dituzte Durangon eta Zornotzan. Iurretan, garbiketa zerbitzua eroaten dute eta Zaldibarko ospitale psikiatrikoan lorezaintza zerbitzua. Etxez etxeko janari zerbitzua ere eskaintzen dute adineko eta mendekotasuna duten pertsonentzat Ermuan eta Berrizen. Durangaldeko 361 pertsonek lan egiten dute Lantegi Batuak-en, erakundeko presidentea den Susan Gureñak azaldu duenez, eta iaz 35 milioi euro baino gehiagoko Gizarte Balio Integratua sortu zuten, eskualdean. Gaineratu du 97,8 milioi euroko negozio zifra izan zutela 2024an, eta hiru milioi euro arteko inbertsioak egin zituztela.
