Valentziako Mercadona supermerkatu kateak datozen asteetan hasiko ditu obrak Mallabiena auzoan duen orubean. "Data zehatz bat ematea gatx den arren, urteko hirugarren hiruhilekoan zabaltzea aurreikusten dugu", diote merkataritza-guneko arduradunek. Hain zuzen ere, proiektua "udarako" martxan izatea da Mercadonaren helburua. Iñaki Totorikaguena Iurretako alkateak azaldu duenez, "udalean administrazio tramiteak amaituta daude. Badauzkate lizentziak eta beharrezko baimenak".
Lehenengoz Durangaldean
Supermerkatu hau Mercadonak Durangaldean martxan ipiniko duen lehenengoa izango da. Mallabienan kokatuta egongo da, beste supermerkatu kate batzuen inguruan. Aurretik, 2016an Abadiñon merkataritza-gunea eraikitzeko asmoa izan zuten, baina, azkenean, bertan behera utzi zuten.