Iurretako XII. Enpresa Proiektuen Lehiaketa ipini dute martxan

Iaz Gerlari kirol zentroak irabazi zuen Iurretako enpresa lehiaketa

Herrigunearen barruan enpresa berriak sortzea sustatzea du helburua Iurretako XII. Enpresa Lehiaketak. Aurkeztutako proiektua martxan jartzen laguntzeko 6.000 euroko saria lortuko du lehiaketaren irabazleak. Azaroaren 30era bitartean aurkeztu daitezke proiektuak.

Batez ere, produktu, prozesu edo zerbitzuen arloetan ideia berriak ekarriko dituzten enpresa proiektuak sustatu gura ditu lehiaketak. Era berean aberastasuna eta enplegua sortzen lagunduko dutenak, edota Iurreta udalerriko merkataritza birgaituko dutenak, udal arduradunek azaldu dutenez. Proiektuek udalerriko errealitatea izan beharko dute gogoan eta herrigunera mugatu beharko dira.

Norberaren enpresa edo denda jarriz lanean hastea erabaki dutenei "bidea erraztu" gura die Iurretako Udalak. "Ideien lehiaketa honen helburua herrigunean espiritu ekintzailea sustatzea da, Iurretako merkataritzak, etorkizunean, bere inguruan garatuko diren ideia berritzaileak izan ditzan oinarri. Aurkeztutako proiektuek herriguneko baldintzekin bat datorren enpresa-errealitatea ekarriko duen ideia izango dute oinarri", gaineratu dutenez.

Lehiaketaren irabazleak 6.000 euro lortuko ditu. Obra eta jarduea lizentziak ematean laguntzaren %20 emango zaio, eta, proiektua gauzatzeko establezimendua irekitzeko lizentzia ematean, %50a. Gainerako %30a urtebeteko epean emango zaio.

 

 

Durangaldeko albiste garrantzitsuak edo azken ordukoak whatsapp bitartez jaso gura dituzu? Bidali ALTA 688 635 041 telefono zenbakira.