Smurfiten atzo gertatutako lan istripua salatu du ELA sindikatuak

Smurfit Kappa Nervion S.A. enpresak Iurretan duen lantokian lan istripua izan zuen langile batek, ELA sindikatuak salatu duenez, atzo eguerdian. Zango bat hodien artean trabatuta geratu zitzaion, eta, horren ondorioz, ospitalaren eraman behar izan zuten. ELAk "gogor" salatu du istripua. Ez "istripu larri bakarra" gaineratu du sindikatuak. Martxoaren 6an, beste langile bat eraman zuten erietxera, "ponpa manipulatzean eskuetan 2. eta 3. mailako erredurak jasan ondoren". ELAk elkarretaratzea egitera deitu ditu langileak, martxoak 13an, 12:30etik 13:30era, enpresaren aurrean.

Istripu bi hauek ekiditu zitezkeela esan du ELAk, "Zuzendaritzak segurtasun neurriak bete izan balitu". Gaineratu dutenez, "enpresa jolasean ari da langileen osasunagaz eta bizitzagaz". ELAk dioenez, "instalazioen narriadura, lan-erritmo azkarregiak, jardueren azpikontratazioa, eta, lan segurtasun eta osasun arloko ez-betetzeak" dira  Smurfit Kappa Nervion enpresako lan-istripuen "arrazoiak".

Egoeraren "larritasuna" salatu du ELAk eta, horren aurrean, "gizarteko gaitz errotik kentzeko erakunde publikoen borondaterik eza", kritikatu dute. Lan-segurtasun eta osasun arloko politika publikoak "guztiz" aldatzeko eskatu du ELAk. "Neurri eraginkorrak behar ditugu, enpresetako lan-segurtasuna benetakoa izan dadin. Gainera, zigor eredugarriak jarri behar dira segurtasun-aginduak betetzen ez dituzten enpresen aurka".

Durangaldeko albiste garrantzitsuak edo azken ordukoak whatsapp bitartez jaso gura dituzu? Bidali ALTA 688 635 041 telefono zenbakira.