Perun egingo dute lehenengo ekitaldia, irailaren 9an, eta horretarako Eusko Jaurlaritzako Gazteria Zuzendaritza izango dute bidelagun. Ekitaldi xumea egingo dute Limako San Francisco komentuko Euskal Nazioaren kaperan. Bertan dago lurperatuta Juan Orobiogoitia eta lore eskaintza egingo dute Ander Añibarro Jaurlaritzako Gazteria zuzendariak eta Itziar Irazabal Gerediaga elkarteko kideak. Jaurlaritzako Gazteria Zuzendaritzako delegazio bat Perura joango da hainbat kooperazio proiektu bisitatzera, tartean eskolak ere bai, eta bidai hori aprobetxatuta antolatu dute ekitaldia.
Irailaren 13an Iurretan antolatu dituzte hainbat ekitaldi. Herriko gaztetxoentzako egurrezko jolasak jarriko dira Olaburu pilotalekuan, 17:00etatik aurrera, eta, 19:00etan, berbaldia eskainiko du Xabier Lamikiz EHUko irakasleak. Juan Orobiogoitiari buruz eta Perun finkatutako euskaldunei buruz jardungo du udaletxeko batzar aretoan. Aurretik, Orobiogoitia gogoratzeko eskola zaharra eraiki zuten lekuan jarritako haritzaren aurrean dantzan egingo dute.
Biografia
1718ko irailaren 13an jaio zen Oromiñon. 11 urterekin umezurtz gelditu zen eta gazte zela Peruko Ciudad de los Reyes (gaur egun Lima) herrira joan zen. Merkataria zen ogibidez eta Limako kontsulatuko epaitegiko kontseilaria izan zen. Baita “Hermandad de los Caballeros Hijosdalgos de la Nacion Vascongada”ko kidea ere bai. 1794ko irailaren 9an, 76 urterekin hil zen. Oinordekorik ez zuen izan, ezkondu ere ez zen egin. Bere testamentuan agintzen zuen bezala Limako San Francisco komentuan lurperatu zuten, Arantzazuko Amaren ohorez eraikitako Euskal Nazioko kaperako sotoan. Lima eta Iurreta sorterriko erakunde eta tokietarako funtsak utzi zituen.
Lehen Letren Eskola, eskola zaharra, 1972ra arte egin zen Iurretako plazan. Urte horretan, Espainiako Hezkuntza Ministeritzak eraikin berria egin zuen eta Arzobispo Lauzirica izena jarri zioten. 1997an, berriz, Iurretako Udalak eskolei izena aldatzea erabaki zuen Juan Orobiogoitiaren omenez. Gaur egun, Haur eta Lehen Hezkuntza zentruak Maiztegi herri eskola du izena, eta DBH eta Batxilergoa batzen dituen ikastetxeak Juan Orobiogoitia Institutua.