Iaz antolatu zuten lehenengoz Mintzopotea. Arrakasta izan zuen Iurretako Udalak onartutako Euskara Sustatzeko Ekintza Planaren (2016-2019) barruan antolatutako ekimen horrek, eta 26 herritar elkartu ziren, World Kafe metodologia erabilita, modu eroso eta atseginean, euskararen inguruan berba egiteko.
Elhuyar Aholkularitzak lagunduta, Euskararen Aholku Batzordeak antolatutako Mintzopoteak kalera atera gura du euskara eta, aurten, beste ikuspegi bat landu gura izan dute antolatzaileek. Horretarako, euskaldun berriak eta jatorri askotariko bizilagun euskaldunak erakarri gura dituzte. “Berbetako eta lagunarterako gogoa” behar da, antolatzaileen hitzetan. Umeentzat begiraleak ere egongo dira II. Mintzopotean.