Urtarrilean hasi zituzten Santa Apolonia auzoa Orozketarako bidearekin lotzeko lanak. Izan ere, Santa Apolonian trenbideko pasagunea itxi zutenetik Durangotik baino ezin da sartu auzo horretara, "eta askotan ez da nahiko izaten", prentsa ohar baten bitartez jakin eragin dutenez. Lan horiekin bat
era, Iurreta eta Durango lotzen dituen Arandiako bidegorria ere luzatuko dute, ingurabideko tunelera arte. Guztira, 400 metro gehituko zaizkio bidegorriari, eta argiteria ere hobetuko dute lau kaleargi gehiago jarrita.
Iñaki Totorikaguena alkatearen berbetan, "herri moduan ere segida emango digun sarbidea beharrezkoa deritzogu; baita Santa Apoloniako herritarrek behar den moduko sarbide segurua izatea ere". Gaineratu dutenez, "oinezkoek ere asko erabiltzen dute bidea izanik, jarraitutasuna emango diegu ditugun oinezkoen ibilbideei: Durangora eta Iurretatik Orozketara. Baita Amuruagako baserrietaraino ere, gero Arriandiruntz jarraitzeko".
Lanak Lasuen enpresari esleitu zizkion udalak 161.469 euroko aurrekontuarekin. "Batez ere, Santa Apoloniako auzokoentzat hobekuntza garrantzitsua izango da, gainerako iurretarrei ere eragingo diena", dio Totorikaguenak.