Iñaki Totorikaguena alkateak azaldu duenez, "udalaren egoera ekonomikoa ez da txarra, momentu honetan. Eta Udalkatxara dirua bueltatzeko momentua etorriko dela badakigun arren zerga eta tasak ez igotzea erabaki dugu denon artean". 2016an %0,21eko igoera izan zuten zerga eta tasak Iurretan.
Totorikaguenak gogoratu du, aurten, Ondasun Higiezinen Zergan (OHZ) izandako aldaketak ere izango duela eragina herritarrengan: "Bizkaiko Aldundiak egin duen katastroaren eguneraketaren eraginez OHZn igoera emango da 2017n".
Larrakozelairekin lotutako prezio publiko ordenantza
Bestalde, zerbitzuak eskaintzeagatiko edo udal jarduerak egiteagatiko prezio publikoen ordenantza arautzailea ere onartu du udalbatzarrak, aho batez. Larrakozelaiko azpiegituren erabilera kudeatuko du udalak eta horri lotuta onartu dute ordenantza berria hau. "Ohiko ez den jarduera baterako edo futbol kluben jardueratik kanpo antolatu daitezkeen ekitaldiei dagokionez prezio publiko batzuk lotu gura dira araudi honen bitartez", argitu du Iurretako alkateak. Azpiegitura hori ordu betean erabiltzeagatk 60 euro ordaindu beharko dira. Prezio hori aldatu egingo da denbora gehiagoan behar izanez gero.