Goizaldeko 05:30ak pasatxoan gertatu zen eraso sexista. Neska biak txiza egitera joan ziren; ezustean, gizon bat gainera bota eta musuka hasi zitzaien. Erasotzailea gainetik kentzea lortu zuten, eta beste leku batera joan ziren txiza egitera. Baina, han ere agertu zen erasotzailea, eta laguntza eskatu behar izan zuten. Lagunak hurreratu zirenean, Sos Deiakera deitu zuten laguntza eskatzeko eta erasotzailea harrapatzeko asmoz. Erasotzaileak ihes egin zuen Durangorako norabidean, eta Ertzaintza etorri arren, bere pista galdua zuten ordurako.
Erasoaren aurrean, elkarretaratze bateratua deitu dute udalak, jai batzordeak eta Anderebidek, eta herritarrei parte hartzeko deia egin diete. Erasoa jasan duten emakumeei babesa agertu diete, eta baliabideak euren esku jarri ere bai. Gaitzespena azaldu dute eraso honen eta emakumeen aurka gertatzen diren indarkeria mota guztien aurrean ere.