60 urtetik gorako pertsonentzako gertutasun eta laguntza programa honetan 18 urtetik gorako edonork parte hartu dezake bolondres moduan. Hiru laguntza mota eskainiko dira: astean ordu bi eskatzen ditu laguntza erregularrak (etxeko konpainia eta kalean ibiltzea); laguntza puntuala ere eskainiko da medikutara edo bestelako gestioak egiteko; azkenik, informazio eta telefono bidezko jarraipena egiteko aukera legoke.
Jendaurreko aurkezpena
Egitasmoaren nondik norakoak azaltzeko jendaurreko aurkezpena egingo dute, gaur, arratsaldeko 18:00etan, Ibarretxe kultur etxean. Gizarte Ongizatea batzordetik bideratutako egitasmoa da. Beharrizan edo bakardade egoeran dauden adineko pertsonen senideei edota bolondres jardun gura duten herritarrei Nagusien Bidelagun programaren inguruko azalpen guztiak emango dituzte bertan.
Pertsona hauei ohiko ingurunean jarraitzeko aukera eskaini gura zaie; “bizi kalitatea hobetzeko eta sare soziala zabaltzeko” aukera. Epemugarik ez dago erabiltzaile zein bolondres izateko, eta egitasmoak harrera ona izatea espero dute.
Zahartze “osasungarri eta aktiboa” sustatzen jarraitzeko ipini du martxan egitasmoa udalak, eta erabiltzaile posibleak ezagutzeko osasun zentroagaz, Durangaldeko Amankomunazgoagaz eta Goiuriako Ama nagusien elkartagaz jarri dira hartu-emanean. 2014an, ke-detektagailuak ipini zituzten 80 urtetik gorakoen etxeetan, etxeko suteen gaineko informazioa emategaz batera. “Egoera aztertzeko balio izan zigun horrek. Hor dauka sorburua Nagusien Bidelagun programak”.