Herriko kirol instalazio guztien erabilera arautuko duen ordenantza "beharrezkoa" dela uste du Iurretako EH Bilduk: "Herriko kirol instalazioak erabilgarri egon behar dira , lehenik, herriko kirol elkarte guztientzat, eta, ondoren, gainontzeko herritar guztientzat. Hainbat kirol instalazio ditu Iurretak: Olaburu pilotalekua, Larrakozelai futbol zelaia, eta Juan Orobiogoitia ikastetxearena den arren udalak kudeatzen duen kiroldegia. Herriko kirol klubek egiten duten lana "errazteko" eta "babesteko" instalazio guztien erabilera arautu behar dela uste du EH Bilduk.
"Arazoari errotik heldu eta konpontzeko" eskatu dio udalari EH Bilduk, "futbol zelaiaren erabileraren harira sortu den liskarra estaltzeko ordenantza 'partxe' bat egiteko tentaldian erori beharrean". Horretarako erabiltzaile ohikoenak diren kluben "adostasuna bilatzeko bideak ireki behar ditu" udalak, gaineratu dutenez.