‘Abendu koplak’ eskainiko dituzte Aita San Migel elizan, 19:00etan. Iurretako eta Oromiñoko taldeekin jardungo dute Ea, Areatza (Muxika), Gautegiz-Arteaga, Ibarrangelu, Mendata, Mendiola (Abadiño), Gernika eta Lekeitioko taldeek. Mendiolako taldeak lehenengoz parte hartuko du topaketa honetan.
Kopla zaharrak lehenengoz 1691an argitaratu zituen Durangoko Nikolas Zubia abadeak Doctrina en basquence liburuan. Liburu hori desagertuta dago, baina geroztik, beste argitalpen batzutan ere argitaratu ziren.
Bizkaiko hainbat herritan egon da Abendu Koplak edo Marijesiak abesteko ohitura; Iurretako taldekideek azaldu dutenez, berton, gutxienez, azken 45 urtetan bai. Ohitura mantentzen duten herrietako koadrilak topaketak egiten hasi ziren 2009an, eta urtero, abenduko bigarren zapatu iluntzean elkartzen dira, bakoitzak bere kantaera estiloa erakusteko.