Lekualdaketa horrekin, Gizarte Zerbitzuak herritarrengandik hurbilago egotea du helburu Iurretako Udalak. Zerbitzu horiek “eskuragarriago” egongo dira, eta bertara doazen pertsonentzat “diskretuagoa” ere izango da, ohar baten bitartez azaldu dutenez. Bidebarrietako udal bulegoetan Udaltzaingoa, erregistroa eta Herritarrendako Arreta Zerbitzua daude momentu honetan.
Espazio berria sortuko dute
Gizarte Zerbitzuak bertora eroateko espazio berri bat sortuko dute. Gizarte langilearentzako bulego bat eta itxarongela bat egokituko dituzte. Horretarako, orain dagoen batzar-gela zatitu egingo dute.
Iñaki Totorikaguena alkateak azaldu duenez, “gaur egun dauden bulegoak egokitu egingo dira iurretarren beharrizanei erantzuteko, eta benetan uste dugu denontzat onuragarria izango dela. Zerbitzua hobetuko dela uste dugu”. Horretarako, 7.586 euroko aurrekontua lotu du udalak. Lanak esleituta, hilabete barru egongo dira prest.