Aitte San Migel Jai Batzordeko kideek jakinarazi dutenez, bazkarirako izena eman daiteke, dagoeneko, Ibaiondo eta Gauargi tabernetan. Bazkariak 15 euro balioko du, eta eguena da izena emateko azken eguna.
Azken urteotan ehun herritar inguru batu dira inauterietako bazkarian, eta, aurten, karpan gehiago sartuko direla azaldu du Miren Abasolo Jai Batzordeko kideak: “150 bat sartuko garela kalkulatu dugu, eta gehiagok ematen badute izena, ahaleginduko gara lekua egiten”. Berogailua eskatu dute dagoeneko. Abasolok gogorazi duenez, nahitaezkoa da mozorrotuta joatea herri bazkarian parte hartzeko. Bazkalostean familia argazkia aterako dute, eta erromeria izango dute Zesuma taldeagaz.
Eguenean, tostada-jana
Inauteriak heldu aurretik, eguen zuri egunerako, tostada-jana antolatu du Jai Batzordeak. Dantzari plazan ipiniko dute otordua arratsaldean.
Martitzen karnabalean, aldiz, umeentzako ikuskizuna egongo da Askondon ipinitako karpan. Disko festa izango dute, eta, kartel batzuetan 18:00etan ageri bada ere, ordu erdi lehenago, 17:30ean, hasiko da saioa.