Adierazpen instituzionalaren bidez, desanexioaren arrazoiak eta orduan hartutako konpromisoak “indarrean” daudela azalduko dute, Iñaki Totorikaguena alkatearen berbetan. Totorikaguenak herri izaera berreskuratzean edukitako helburuak gogoratu ditu: “Herritarren beharrizanetatik hurbilago egotea, baliabide publikoak hobeto kudeatzeko udalerri orekatu bat izatea eta zerbitzu publikoak herritarrei hurreratzea”. Zapatuan, adierazpena irakurri eta gero, elizateko mahaia ipiniko dute elizpean; izan ere, antzina, elizateetan, eliza aurrean eta mahai baten bueltan lantzen ziren gai publikoak batzarretan. Batzar horiek sinbolizatzeko, harrizko mahaia ipiniko dute elizpean, plaka bategaz.
1989: txapliguak Durangon
Desanexioa bultzatzeko lehen gestora 1983an sortu zen, Iurretan. Harrezkero, “negoziazio gogorrak” izan zirela gogoratu du Mikel Sopelana gestorako kide izandakoak. Diru kontuek eta muga geografikoek –Orozketan eta Landakon– eragin zituzten buruko min handienak. Sopelanaren ustez, 1991ko urtarrilekoa baino data gogoangarriagoa da 1989ko maiatzaren 23koa. Egun horretan, Durangoko Udalak desanexiorako puntuak onartu zituen osoko bilkuran: “Udalbatza iurretarrez bete genuen, eta txapliguak eta guzti bota genituen gero, Durangoko udaletxeko balkoitik”. Ilusio handiko urteak izan ziren, Sopelanaren arabera.
25. urteurreneko irudia
2015ean irudi berezi bat erabiliko du Iurretako Udalak, urteurrenearen harira sortutakoa. Iurretako armarriaren bertsio bat da, magenta kolorean sintetizatua, eta, zuhaitzagaz eta dorreagaz batera, Iurretako banderaren izarra dauka barnean. 25.urteurrenean erabiliko da marka hori, eta, urtea amaitu ostean, irudi berriagaz jarraituko duten edo ez erabaki barik dagoela azaldu du Iñaki Totorikaguena alkateak.