Hamabost behargin izan ditu Arriaundiko pastelgintzak. Euretako bost pastelgintzatik okintza sailera subrogatu zituen zuzendaritzak, irailean, eta beste bost asteburuan kaleratu ditu: “Gelditzen diren bostekin ez dakigu zer gertatuko den, baina argi dago pixkanaka pastelgintza atala suntsitzen dabilela zuzendaritza”, azaldu dute LABetik. Bost langile horiek pastelgintzan daude kontratatuta, eta ordu batzuk okintza sailean egiten dituzte.
Gaur dira batzartzekoak sindikatua eta zuzendaritza, kaleratzeen inguruan eta lan egutegiak direla-eta izan dituzten auzien inguruan berba egiteko.
LABen eskariak
LAB sindikatuak kaleratzerik ez egotea eta lanpostu guztiak okintzan subrogatzea gura duela azaldu du: “Baina pastelgintzako kontratuen baldintzekin, legeak dioen moduan”. LABekoek kritikatu dute okintza sailera subrogatutako bost langileek ez dituztela jatorrizko lan baldintzak.