Osoko bilkuran onartu dute zerrategia lekuz aldatzeko prozesura 450.000 euro bideratzeko diru atala. Diru horrekin ordainduko dira aktibitatea tokiz aldatzeko kalteordaina, zerrategia bera botatzea eta esleipen soberakinak. Bideondoko lur horien % 44 Iurretako Udalarena da, eta 450.000 euro horiek aurreratu egingo ditu udalak, gero beste jabeengandik % 56 kobratzeko.
Zerrategia, beraz, abenduan hasiko dira botatzen, enpresa Bideondotik Goiuriako errepide albora eroateko. Urtea amaitzerako lursaila hutsik egon beharko da. Orduan hasiko du udalak birpartzelazio prozesua, eta epe ertain-luzera bertan etxebizitzak egiteko proiektua hor dago. Iñaki Totorikaguena alkateak azaldu duenez, lau etxebizitza bloke izango lirateke, guztira 64 etxebizitzagaz. Bloke horietako bi udalarenak izango lirateke: "Printzipioz etxebizitza guztiak libreak izango lirateke, baina pentsatu beharko da zelan kudeatu". Testuinguru ekonomikoa hobetzerakoan hasiko litzateke lurrotan etxeak egiteko tratua enpresa etxegileekin.