Smurfit enpresak ohartarazi du oso eragin txarra izango duela horrek enpleguan; Iurretako lantegian eta hori hornitzen duen basogintzan edo industria osagarrian.
Espainiako Industria ministroak bultzatutako erreforma elektrikoak %22 gutxitu ditu urte hasieratik kogenerazioari emandako laguntzak. Horri gehitu behar zaizkio otsailaren hasieran proposatutakoak.
Urtean 120.000 metro kubiko egur gehiago erreta Iurretako lantegiko ekoizpena %20 handitzea zen asmoa. Prozesuak sortutako hondakina, sektorean ‘likore beltza’ deitzen zaiona, erregai gisa baliatu gura zuten 2012an irekitako argindar kogenerazio plantan (20 milioi euroko inbertsioa eskatu zuen). Orain planta osoaren iraupena dago auzitan, laguntza publikorik gabe argindarra ekoiztea errentagarria ez dela kalkulatu du-eta enpresak.