Guztira 36 gazteren aurkako operazioa burutu dute bart Polizia Nazionalak eta Guardia Zibilak. Atxilotuei Segiko kide izatea egozten diete, eta tartean Eñaut Aiartzaguena iurretarra eta Ibai Esteibarlanda elorriarra ere badaude. Polizia Nazionalak atxilotu du bere etxean Aiartzaguena, goizaldeko 01:15 inguruan. Etxea miatu eta Madrilera eraman dute handik lau bat ordura. Esteibarlanda Hondarribian atxilotu omen dute. Bestalde, operazio berean, Guardia Zibilak elkarte bat miatu du Iurretan, eta hainbat kaxa atera dituzte bertatik.