Garapenerako lankidetza egitasmoetara 19.860 euro bideratuko ditu Iurretak, aho batez onartu dutenez. Adeco elkarteak aurkeztutako Lan-munduratze eta osasun onerako tailerrak: okintza produkzioa eta erizaintza gazteekin eta minusbaliotasuna duten pertsonekin, San Martin eskualdean (Peru) egitasmoa garatzeko 12.148 euro bideratuko dituzte; Reciclanet elkarteak aurkeztutako kooperazio eta garapen egitasmoari laguntzeko 1.210 euro, eta, 2006ko otsailean izandako uholdeen eraginez Saharako La Güera Dairan kaltetutako familia-etxebizitzak zaharberritzeko 6.500 euro.
Eskola-porrota eta hezkuntza arazoak, minusbaliotasuna duten pertsonak, marjinalitate baldintzak eta osasun egitasmoetara heltzeko arazoak… halako egoerei aurre egitera bideratutako proiektua da Adecok Perun bultzatutakoa. Gutxietsitako hainbat kolektibo gaitu gura dituzte gehien eskatutako lanbideak ondo bete ditzaten, eta gazteek ere ikusi dezaten lana baliabide baliodun eta eraginkorra dela sozialki integratzeko.
Reciclanet elkarteak, bestalde, Chiapas eskualdean (Mexico) formazio informatikoan eta osasunaren komunikazioan laguntza teknikoa egitasmoa landu du. Chiapasen, Caracoles-ko osasun zentroetarako (tokiko zentro administratiboak) software libredun hezkuntza baliabideak ez eze material informatikoa bideratzeko erabiliko da Iurretatik bideratuko den dirua.
Bost ordenagailu, birziklatutako material informatikoa, osasun-administraziorako prestatutako bost ordenagailu eta Caracoles-ko osasun zentroetarako Software Libredun hezkuntzarako baliabideak eroango dira. Era berean, formazio auletarako —herritarrek eta pertsonal sanitarioek formatzeko aukera izan dezaten, teknologi berriak ezagutzeko ez eze— 18 ordenagailu ere eroango dituzte. Oro har, Chiapasko komunitate indigenetan asistentzia medikoa hobetzea da helburua, beharrezko baliabideak eta ezagutza informatikoa eskainiz. Era berean, batez ere, emakume eta umeei formazio informatikoa eskaintzea.
Azkenik 2006ko otsailean izandako uholdeen eraginez Saharako La Güera Dairan kaltetutako familia-etxebizitzak zaharberritzera 6.500 euroko laguntza bideratzea onartu dute udal arduradunek. Gogoratu dezagun 2002an anaitze akordioa onartu zuela Iurretako Udalak La Güera Dairarekin, “askatasun, parte hartze eta elkartasun giroa” lortzea helburu dutela. “Haren bidezko borrokan eta autodeterminaziorako eskubidean herri sahararri laguntzea” da anaitzearen helburua. Frente Polisario Sahararraren Delegazioarekin elkarlanean bideratzen dute bien arteko hartu-emana.