Urrian hasi zen biritxinagatarren buruhaustea. Lursailaren jabeagaz akordiora heldu, eta eskriturekin Berrizko udaletxera joan ziren, salerosketa ofizialtzera. Hasieran erreklamatu egingo zutela esan zieten, baina, alkateagaz eta oposizioagaz batu ostean, atzera egin zuten. Gero, Garaiko Udalaren interesa etorri zen, eta ordezkariekin batu zen Biritxinaga. “Esan ziguten ez zela egingo jarrera txarragaz, eta lasai egoteko”. Baina martxoaren 4an udalak herriko baserritarrekin batzarra egin zuen, gaia aztertzeko. Biritxinaga beste nekazari batzuekin joan zen udaletxera: “Ez zidaten batzarrera sartzen utzi, eta ENBA sindikatuko ordezkariari ere ez”.
Biritxinagak azaldu du ustiategiaren bideragarritasunerako behar dutela lursaila. 400 behiri belarra jaten emateko gura dute. Behargin bi ere badituzte, eta, horregatik, ENBAk lau lanpostu arriskuan ipintzea egotzi dio udalari. Biritxinagak esan du gero eta lur gutxiago dagoela nekazarientzat, eta haiena dela eskualdean geratzen den ustiategi bakarrenetakoa.