Durangaldeko 59. Txistulari Eguna ospatuko dute gaur, domeka, Garain. Jaizale txistulari elkarteak antolatuta eta udalak babestuta, Elizabarrin egingo dute kontzertua, 12:30ean. Horren aurretik, San Migel elizatik kalejiran joango dira Elizabarriraino. Kontzerturako 60 bat musikari batuko dira; horietatik 30 izango dira eskualdeko txistulariak. Euregaz batera, domekarako beren-beregi Garain sortutako abesbatzak parte hartuko du.
Alex Agirrebeitiak zuzenduko du hamabi piezako kontzertua. Carlos Sánchez-Barba zaldibartarraren eta Jose Ignacio Abasolo iurretarraren moldaketa bi ere joko dituzte. Ostean, dantza saioa egingo dute.