Otea-Loran elkarteak bultzatu du proiektua; barikuan, apririlaren 5ean, egingo dute aurkezpena, 19:00etatik aurrera.
Barikuan aurkeztuko dute Garai: ohiturak, dantzak eta jaiak liburua. Otea-Loran elkarteak bultzatu du proiektua, eta elkartean bertan egingo dute aurkezpena 19:00etatik aurrera. Bultzatzaileek esan dute 2009an hasi zirela ideia garatzen: "Hasierako helburua, sakabanatuta zegoen informazio guztia batzea izan zen". Iaz liburua sortzeko aukera suertatu zitzaien, eta udalaren babesaz gainera, Gerediaga elkarteko Txelu Angoitiak lagundu die koordinazioan.
Hasierako helburu hartatik sendotzen joan da proiektua; aparteko informazioa batu dute herriari buruz. Esaterako, lehengo ohitura haietatik gaur egun geratzen direnen inguruko argazkiak eta testuak ere badaude liburuan. Bertan, protagonistak garaitarrak izatea gura dute, adierazi dutenez. Ohitura, dantza eta jaien inguruko ikerketa Iñaki Irigoienek egin du, eta osorik dago liburuan. Gaur egungo argazkiak Angoitiak jaso ditu, eta testuak Uxune Martinezek ondu ditu. Gainera, DVD bat ere badakar lanak. Bizkaiko Dantzarien Biltzarreko Jon Gamindek egindako dokumentala, argazkiak eta dokumentuak daude grabatuta.
Emaitzagaz pozik
Otea-Loran elkartekoak pozik agertu dira emaitzagaz. “Angoitiak koordinazio lan bikaina egin du”, esan dute. Liburua sortzeko beharrean hainbat kontaktu egin dituzte, eta aurrerantzean ere informazioa batzen jarraitzeko asmoa daukate.