Aste honetan ekin diote beharginek Garain kontenedore berriak ipintzeko obrari. Udal arduradunek azaldu dute sei asteko epea daukatela egitasmoa amaitzeko.
Herrigunean eta Milikun lurpeko edukiontziak kendu eta berriak ipiniko dituzte kanpoan. Aiartzan, San Juanen eta Kurutzondon birziklatzeko hiru kontenedoreak egokituko dituzte. Barrainkun eta Beratun edukiontzi bakarra ipiniko dute. Auzoen sarreretan ipiniko dituzte kontainerrak, kamioiak baserrietara sartzea sahiesteko.
Joan zen astean partaidetza foroa egin zuten Garain. Dozena bat lagunen aurrean azaldu zuten obra. Gontzal Sarrigoitia alkateak adierazi du partaideek ondo ikusi zutela aldaketa. Kexarik ez zuten agertu batzarrera hurreratu zirenek.