Lanbidek emandako datuen arabera, Garain dago langabetuen portzentaia txikiena. Euskal Autonomia Erkidegoko apirileko balantzea publikatu du Lanbidek. Garain, 210 biztanle aktibotik, lau bakarrik daude lan barik. Ehunekoetara eroanda, %1,9koa da indizea.
25-45 adin tartean ei daude lan bakoak, guztiak zerbitzuen alorrean ibilitakoak. Langabetu-tasa %16,1ekoa da Bizkaian, eta EAEn %14,9koa.
Durangaldeari erreparatuta, Garairen ostean Mañaria kokatzen da, %8,8ko indizeagaz. Lanerako gai diren 250etik, 22 daude lan barik. Eskualdeko tasa handiena Iurretan dagoela diote datuek: %15,3. Lan barik 290 biztanle daude, 1.895 aktiboren artetik. Iurretaren ostean, Zaldibarrek dauka tasa altuena: %13,4. Lana gura duten 1.507tik 202 daude bila. Durangaldean, 4.959 pertsonak ez dute lanik topatzen, azken datuen arabera.