Heziketarako eredu berria esperimentatzen ari dira bertan urriaz geroztik hamazazpi lagun.
Haurren zaintza partekatzeko eta zaintza modu berriak bilatzeko sortu du familia-talde batek Umerri. Garaiko San Migel eliza osteko etxean hartu dute lekua; urrian zabaldu zuten jolasteko eta ikasteko espazioa, iaztik proiektua mamitzen ibili ostean. Umeak bezala, helduak ere hazteko gunea dela diote bultzatzaileek.
“Egitasmo zabala da, antzeko interes, behar eta kezkak dituztenei irekita dagoena”. Hain zuzen ere, gurasoez gainera, etorkizunean umea izan gura dutenak eta proiektuan interesdunak ere badaude taldean. Guztira, hamazazpi lagunek dihardute.
Euren erritmoaren arabera
Helburua, honakoa: “Haurrak euren erritmoaren arabera haztea eta lasaitasun handiagoz eta presa gutxiagoz bizitzea”. Ingurune natural batean. “aurreiritziek, manipulazioek, espektatibek, zigor edo sariek tokirik ez duten ingurune baten alde”, dabiltza beharrean.
Momentuz hamar umeren bueltan daude Umerrin, eta horietatik lau egunero doaz. Txikienak gurasoekin ere egoten dira, hezitzaileagaz gainera. Gurasoetako batek lehen hileotako balantze positiboa egin du.