Urtemuga garrantzitsua izango da aurtengoa Garaiko Otea-Loran elkartearentzat, 25 urte dira-eta sortu zenetik. Data hau ospatzeko zerbait berezia egin gura dute, eta horretarako, herritarren parte-hartzea eskatu dute, euren iritzia eman dezaten.
Elkartekoek adierazi digutenez, uztailean egin gura lukete ospakizuna, “herriko jaien aurretik”. Dena dela, “oraindik ez dago ezer itxita”, Otea-Loranekoen arabera. Izan ere, garaitarren proposamen eta aholkuak jaso gura dituzte, eta hori bi eratara egin dezakete herritarrek: astelehenero 19:00etan elkartera joanda, edo bestela zuzendaritza batzordeko kideei jakinaraziz.
Otea-Loranek estatutuak berritu ditu oraintsu, eta 90etik gora bazkide ditu.