Azkenean, enkantean saldu ditu Laixiar inguruko pinuak Garaiko Udalak. Azken udalbatzarrean Central Forestalen eskaintza ekonomikoa onartu dute. Pinuak 120.753 euroan hartu ditu enpresak —horri %9ko BEZa gehitu behar zaio—. Hiru eskaintza jaso izan ditu Udalak, azaldu dutenez, eta azken hori jo dute egokitzat.
Laixiar inguruan 8,5 hektareako lur-eremuan, guztira, 1.745 pinu izan ditu saltzeko Udalak. Joan zen urteko ekainean atera zituen enkantean lehenengoz, 132.200 euroan. Hala ere, ez zen enpresarik aurkeztu; hutsik geratu zen lehiaketa, eta, negoziazio prozedura hastea pentsatu zuten, baina, bertan behera geratu zen hori ere. Azkenean, enkante publikoan saldu dituzte pinuak, adierazi duten moduan.