Elorrioko Txintxirri Ikastolan  41 plaka fotovoltaiko daude argindarra sortzen

Anboto

Teilatu Bizia egitasmoko plaka fotovoltaikoak. txintxirri

Elorrioko Txintxirri Ikastolako Teilatu Bizi egitasmoko eguzki panelak martxan dira dagoeneko. Instalazio fotovoltaikoak 41 modulu ditu, 24 kilowatt-eko potentziagaz, eta 140 metro koadroko azalera hartzen du Haur Hezkuntzako eraikin berriaren teilatuan, ikastolatik informatu dutenez.

Egun eguzkitsuetan, kontsumitzen dutena baino elektrizitate gehiago sortzen dutenez, soberakinen zati bat Elorrioko Anbotopeko elkarteari ematen diote, haiek denda duten elektrizitate kontsumoari aurre egiteko. Anbotopeko Elorrioko eta inguruko nekazarien elkarte bat da, bertako produktu ekologikoak herritarrei zuzenean saltzeko denda bat daukana. Teilatu Bizia proiektuaren beste ardatza ortua da. Iaztik dago martxan. Ikastolako familiek auzolanean egin zuten eta auzolanean lantzen dute, sasoiko produktu ekologikoak ekoizteko. Egitasmoa 2023an sortu zuten, Haur Hezkuntzako eraikin berriaren teilatu lauari erabilera emateko asmoz. Ingurumenagazko konpromisoa, elikadura, auzolana eta herrigintza ditu oinarri. 2024an, FAGOR Herrigintza ekimenaren deialdian 40.000 euroko diru laguntza jaso zuen. 


Auzolanaren bitartez egin eta lantzen dabiltzan ortua. TXINTXIRRI

 

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!