Lazkanoren berbetan, EH Bilduk alkatetza berretsi gura du, azken bi legegintzaldietan hasitako proiektuari jarraipena emateko. Besteak beste, gazteek etxebizitza topatzeko duten arazoa konpontzea lehentasunezkoa dela azaldu du, baita, Elorriok herri bizi bat izaten jarraitzeko lan egingo dutela.
Casanovak, ostera, Bizkaiko Ahaldun Nagusia bera izanez gero, gobernantza eredu berri bat ekarriko duela azaldu du. "Jendea haserre dago politikarekin, uste du ez dituela herritarren arazoak konpontzen, eta hori arriskutsua da. Indibidualismoa gora doa, eta baita arriskutsuagoak diren jarrerak. Eredu ekonomiko sendo bat eta abangoardiako politika sozialak behar ditugu. Durangaldean ematen ari den aldaketa Bizkaia osora zabaldu behar dugu", esan du.
Julene Lazkano alkategaia buru duen zerrenda babesteko, Durangaldeko EH Bilduren alkategai ugari hurbildu dira ekitaldira, baita, besteak beste, Jasone Agirre legebiltzarkidea ere.