Inbertsio nagusienei dagokienez, Ibarrako urbanizatze lanek 140.000 euroko diru-partida izango dute. Belengua kaleko obrei dagokionez, inbertsioaren atal bat aurrekontuetatik jasoko dutela eta beste guztia gerakinetik batuko dutela azaldu du gobernu taldeak. Eskolako leihoen aldaketako bigarren fasearentzat zein Musika Eskolako komunentzat 67.000 euroko partida bideratuko dute, eta Argiñetako baselizaren teilatua konpontzeko 50.000 euro aurreikusi dituzte.
Horiez gain, Aldatsekua jauregiaren –Nagusien Etxea– kanpoaldea konpontzeko proiektua idazteko 15.000 euro aurreikusi dira. Turismorako ekintzek eta landa eremutako bideak garbitzeko partidak 28.000 euro izango dute batak zein besteak. Gizarte zerbitzuei dagokienez, Ongintza eta laguntza asistentzialak 14.500 euroko partida izango du, besteak beste. Bukatzeko, kiroldegiko frontoian aldagelak eraiki eta Arriolaren eraikineko teilatua konponduko du udalak.