Eguaztenean amaitu zen Ramadana, musulmanen baraualdia. Hilabetez, egunero, eguzkia irteten denetik sartu arte ez dute jaten eta edaten, ezta sexu harremanik edukitzen ere. “Jainkoari eskertza emateko modu bat da, guri laguntzeagatik eta indarra emateagatik”, azaldu du Najib Oulad Elorrioko imanak. Eguaztenean, eskolako pabilioian batu eta ramadanari agur esan zioten 70 bat elorriarrek. Jaialdi zabala izan zen, lehenengoz, herritarrei euren bizimodua ezagutzera emateko helburuagaz, eta horregatik ospatu zuten eskolan. “Gure kultura auzokideekin partekatu gura genuen”, esan du Ouladek. Errezatu egin zuten, emakume eta gizonak aparte zeudela, eta ostean, tea eta pastak eskaini zituzten.
Elorrion, gustura
Elorrioko musulmanen elkartea 2010ean sortu zuten, eta Anduetxeta kalean daukate bilgune kulturala. Herrian gustura bizi direla azaldu du imanak: “Elorrion baldintza onak daude, eta %70ek lana dauka. Gainera, herri polita eta lasaia da”.
Euren erlijioa, islama, indarkergiagaz lotuta ageri da askotan komunikabideetan, eta, horren aurrean, elkarbizitzarako deia egin du Ouladek: “Gutxiengoa dira ekintza anker horiek egiten dituzten musulmanak, ez daude burutik ondo. Ez da mendebalderako arriskua bakarrik; gure herri eta leku sakratuetan dago arriskurik handiena. Elkarbizitzaren alde lan egin behar dugu, bai guk bai agintariek”.
