Udalak dioenez, aparkaleku horrek 130 plaza ditu, eta horien artean gainontzekoetatik itxita dauden bi tokiren jabe da udala, beste plaza batzuen antzera. Udaltzaingoaren autoetako bati eta Hirigintza arlorako erabiltzen duten beste auto bati eraso diete. Horiez gain, erasotzaileak Elorrioko udaltzain batek aparkaleku horretan daukan beste plaza batera ere sartu dira, auto propioari hainbat kalte eraginez.
"Gertakari hauek guztiz soberan daude, eta herritarren batek Udalarekiko kexak baditu, existitzen dira beste bide batzuk kexa eta haserre horiek udaletxean adierazteko. Ez dugu uste era honetan gauzei irtenbiderik eman ahal zaienik, eta orain, zoritxarrez, gutxi batzuek sortutako kalte horiek guztion artean ordaindu beharko ditugu”, adierazi dute udal ordezkariek.
Ertzaintzaren Ikerketa Taldea erasoa izandako gunera hurbildu eta zenbait azterketa burutu ditu aztarnak bilatzeko helburuarekin. Ikerketak oraindik zabalik darrai.