Transportes Nanuk garraio enpresan lan gatazka gogorra bizi izan zuten duela pare bat urte, greba luze eta guzti. Akordioa lortu zuten azkenean, eta bazirudien arazoak konponduta zeudela. Baina, orain berriro piztu da gatazka.
Beharginen ordezkariek esan dute akordiorako hainbat proposamen egin dituztela, "kontuan edukita enpresa ez dela bere momentu ekonomiko onena bizitzen ari". Bost eskari nagusi izan dira: enpresaren antolaketan komiteak partaidetza eta kontrola edukitzea; langileei bezala bazkideei ere herrialdeko hitzarmenaren arabera soldata bajatzea; enplegua ez suntsitzeko bermea; gerentziak erantzukizunak onartzea; eta bazkideek pentsio fondora egiten dituzten ekarpenak berehala bertan behera uztea.
Baina, enpresa komitearen arabera, "enpresaren erantzuna kaleratzeak adosteko aukera izan da". Beharginen ustez, gerentziakoak dira "egoeraren benetako errudunak". Une honetan, "Soldata jaitsiera edo beste edozein murrizketa noiz inposatuko zain" daudela adierazi dute komitekoek.
