Ordutegia eta sistemak
Idoia Buruaga alkateak azaldu zuenez, Berrio-Otxoa kalea goizeko lehen orduan bidea laburtzeko erabiltzen du jende gehienak; “zirkulazioaren %90”, hain zuzen. Horregatik, ordutegia 07:30etik 08:30era atzeratzea erabaki zuten uda hasieran. Gainera, itxiera ordua 12:00etara aurreratu zuten, baina jaien ostean, 13:00etan ezarri dute. Buruagaren esanetan, “saltokiak ez kaltetzeko” hartu dute erabaki hori.
Buruagak aurreratu zuen ez dela ordutegiaren kontua bakarrik, Alde Zaharreko sarrerak kontrolatzeko sistemak ere begiratzen dabiltzala. Adibidez, barruan denbora mugatu batez egoteko eskubidea ematen duen sistema baloratzen dabiltza.
Buruagaren arabera, datozen asteetan batzarra egingo dute Berrio-Otxoa kaleko merkatariekin, zirkulazioa kontrolatzeko modua adosteko.