Udalak 12.000 metro karratuko lursail bat hartu du Montorra eta Buskantz kaleen artean, udaletxearen atzealdean dagoen inguruan, hain zuzen ere. Lursail hori herritarren erabilerarako eskaintzea izango da helburua, Joseba Mujika alkateordeak prentsa ohar baten bidez azaldu duenez. Aparkaleku publikoa, berdegunea eta pasealekua dira bertarako aurreikusitako proiektu posibleak. Gainera, jaietarako eta ekitaldi handietarako balio ahal duela ere uste du udalak.
Lurraren jabeagaz lau urterako lagapena sinatu du udalak, eta udalari eragingo dion kostu bakarra epe horretako OHZ zerga (ondasun higiezinen gaineko zerga) ordaintzea izango da.
Mujikaren arabera, Hiri Antolamendurako Plan Orokorrean, etxebizitzen erabilerarako zehaztuta dago lursail hori, baina, ez duenez funtzio hori betetzen, beste beharrizan baterako erabiltzea erabaki dute.