Autopsia bi egin zizkioten, eta heriotza naturala izan zela ondorioztatu zuten. Baina senide eta lagunek Espainiako Gobernuaren espetxe politika jo zuten errudun: “Hamahiru urte luze hauetan erail dute krudelkeria neurtu eta sistematizatu baten bidez”, adierazi zuten prentsaren aurrean. Hiru bat hilabete geratzen zitzaizkion hamahiru urteko kartzela zigorra betetzeko, kale borroka ekintza batzuetan parte hartzeagatik. Bellon hil eta hurrengo egunetan manifestazio jendetsuak egin zituzten Elorrion.
Bellonen kasuaz gainera, hemezortzi urte beteko dira otsailaren 7an Jose Mari Aranzamendi Katxue presoa hil zela. Testuinguru horretan, Espainiako kartzela politikaren kontrako ekitaldira deitu du lagun talde batek hurrengo barikurako. Espetxe politika kriminalari stop lelopean egingo dute ekitaldia, 19:30ean, plazan.