Hitzaldiak, musika, bazkaria, jolasak, elkartasun jaialdia, musika... egitarau zabala antolatu du Elorrioko Udalak, herriko kultur eta kirol elkarteen zein gizarte eragileen laguntzagaz. Bihar abiatuko dute egitaraua \'El Belen, Arte e Iconografia\' berbaldiagaz.
Satur Peñak emango du Belenari buruzko berbaldia Iturri kultur etxean, 18:00etan. Ondoren, Aldatsekuan afari eta dantzaldi berezia izango dute, La Esperanza nagusien elkartekoek antolatuta. Erretratuak argazki erakusketa ere zabalduko dute, Iturrin.
Abenduaren 23rako Gabonetako Kainaberako Jaialdia, azoka eta umeentzako antzerkia antolatu dituzte: Olentzero eta katu miragarria antzezlana taularatuko du Kalika Teatrok. Horrezaz gainera, urtarrilaren 5era bitartean, hainbat ekitaldiz disfrutatzeko aukera izango dute elorriarrek zein bertaratuko direnek: gabon parkea, San Txibiri herri lasterketa, Arrigola marrigola umeentzako antzerkia (Aiola Teatroa-Jone Irazabal), mendi irteera, jolasak....