Herriko ikastetxeetako hamar irakasle pedagogia etikoaren inguruko ikastaroa jasotzen ari dira. Udalak eta Baketik fundazioak hitzarmena sinatu zuten otsailean, gatazka politikoaren ondorioz gizartean sortutako hausturak bideratzen ahalegintzeko.
Berradiskidetze kultura deitzen diote zeregin horri. Hainbat ekintza eratu zituzten ildo horri jarraituta, eta horietako bat da Txintxirri ikastolako, Herri eskolako eta Lourdes ikastetxeko hamar irakasleen formazio ikastaroarena.
Irakasleentzako baliabide teoriko zein praktikoak eskaintzea ei da helburua. Zortzi ikasgai dauzkate: muga, eskerra, kontzientzia entzutea, giza duintasuna, elkarrizketa, enpatia, pazientzia eta maitasuna. Ikastaroa jaso eta gero, ikasleekin landuko dituzte edukiak.