Amgalako proiektuan jarraituko dute beharrean, kirolgune bateko futbol zelaierako materialagaz.
Gaur arrastian hartuko dute Tinduferako hegazkina 30 bat elorriarrek, Amgala herrian errefuxiatutako saharauiekin egun batzuk pasatzeko. Institutua, Txintxirri ikastola, Lajwad elkartea eta Elorrioko Udala dira bultzatzaileak. Erakundeotako ordezkariek eta 25 ikaslek osatu dute taldea.
Astebete egingo dute Amgalan. Kirolgune bat eraikitzea dute helburu. Futbol zelaiagaz hasi ziren aurreko urteetan, eta aurten ateentzako sareak eta marrak pintatzeko makina daroatzate. Egitasmoak zein norabide hartuko duen ere ezagutuko dute. Bestalde, emakumeentzako nekazal eskola ere bisitatuko dute, esaterako.
Institutuko zuzendari Josu Etxaburuk dio konpromisoz betetako proiektua dela, eta “ikasleen erantzukizuna” indartzeko balio duela. Familien babesa eskertu gura izan du.