3 eta 13 urte bitartekoentzako ikasteko eta jolasteko egitaraua osatu dute.
Lehenengo aldia da Elorrion Udalak Aste santurako udalekuak antolatuko dituztena, azaldu dutenez. “Umeek euren oporretan tailerrekin, jokoekin eta kirol-jarduerekin gozatzeko aukera izatea da helburua”, dio Ana Otadui alkateak. Jarduerak talde dinamikoetan eta umeen adinaren arabera prestatuko dituzte, apirilaren 2tik 4ra eta 10etik 13ra bitartean.
Goizeko 09:00etatik 14:00etara eskainiko dute zerbitzua. Edozelan ere, jantokira doazenek 15:30era arte egoteko aukera izango dute. 6 urtetik gorakoek, goizaz gainera arratsaldez ere badute aukera ekintzetan parte hartzeko, Kirolaren Astea izango da-eta apirilaren 10etik 13ra. Hauek dira kirolak: igeriketa, txirrindularitza, herri-kirolak, xakea, pilota, errugbia, eskalada, arku-tiraketa eta futbito. 11:30-13:30 eta 16:00-18:00 dira guztietarako ordutegiak.
Kirolaren Astean inskribitzeko Iturri kultur etxera jo behar dute martxoaren 29a baino lehen; ez da ordaindu behar. Udalekuen kasuan, tarifak ezarri dituzte 90 eta 109 euroren artean, adinaren eta ordutegiraren arabera. Kiroldegian eman behar da izena, martxoaren 25a baino lehen.