Tradizioari eutsiz, kalejira egin zuten 14 errebonbiloek, kapitaina eta txistulariekin, eta lehenengo tiroak Sortzez Garbiaren basilikari eta Udaletxeari begira bota zituzten. Alkatearen etxe aurreraino ere hurreratu ziren tiroa botatzeko.
Errosarioko Ama Birjiinaren prozesioa babesteko irten zuten arratsaldean berriro, eta plazan batutako herritarren aurrean dantza erakustaldia eskaini zuten. Udalak antolatuta, erromeria giroa ere izan zuten elorriarrek Alaiki plaza-taldearen eskutik Errebonbilo Egunean. Era berean, arkume errea dastatzeko aukera izan zuten. Gonbita gustura onartu zuten herritarrek. Egunsentiko hotzak jai giro epelari egin zion lekua domekan, eta eguraldia ere lagun izan zuten errebonbiloek.