LABeko ordezkarien berbetan, urteetan “autonomo faltsu” lez jardundako kaleratutako bederatzi langileok, laneko ikuskatzailetzak soldatakoak izan behar zirela esanez akta jaso eta gero, euren eskubide eta enpresaren erantzukizunei buruzko aholkularitza eske jo zuten LAB eta CCOO sindikatuetara. “Horren aurrean,baina, enpresak kaleratu egin ditu”. Enpresarekin hartu-emanean jarri gura izan dute esan dute sindikatuko ordezkariek, erantzunik izan gabe.
Langileon egoera salatu du LABek, Durangaldean —batez ere, metal arloan— gertatzen diharduenaz ohartarazi: “Enpresa handiei begira, azpikontrata legez, enpresa txikiak sortzen ari dira; eta batzuk (batez ere gizonak) soldatapeko langileak diren arren, beste batzuk, emakumeak askotan, kontratu gabe, edo autonomo izatera behartuta dihardute. Askoz merkeagoa da eta langileokiko ezelango erantzukizunik ez du enpresak”. Lan merkatuak “prekarizatzen” jarraitzen duela salatu du LABek: “eta beti legez, zoritxarrez, emakumeei dagokie zatirik txarrena”.