Urak hartzeko arriskua jaisteko eta egoera hobetzeko lur urbano eta urbanizagarri moduan kalifikatutako lursailei begira azterketa hidraulikoa eskatu du Udalak, Zumelegi ibairen eta Toloto, Mendraka eta Erreka-Zabaleta erreken ibilguekin lotuta.
Agustin Asua alkatearen berbetan, “Jaurlaritzako Ur Zuzendaritzakoek esan digute 10 urtera begira urak hartzeko arriskua duten eremuak badaudela; eta, irtenbideak topatu ezean hor ezingo litzakeela eraiki”. Arrisku handiena Ibarra eta Montorra inguruan ei dago.
Hiri-Ordenaziorako Plangintzan eragin dezake horrek, hil honetako udalbatzarrean onartu gura dena eta ordurako gertu izan gura dute. Azterketa hori egiteko 18.734 euro erabili dituzte udal arduradunek.