Ur edangarriaren tokiko sarea konpondu eta kudeatzeko akordioa adostu dute Udalak eta Bilbao-Bizkaia Ur Partzuergoak; 10 urterako akordioa, bost urtera luzagarria. Birjarpen-egitasmoa egingo du Udalsareak (partzuergoarekin itunduta dago), 2. mailako sarearekin lotuta; Udalak hor esandakoa betetzeko konpromisoa hartu du, urtero udal aurrekontuan atal bat gordez.
Agustin Asua alkatearen berbetan, itunak urtero 120.200 euro bideratzea batzen du: “Hala ere, erdiari partzuergoak egingo dio aurre. Gainera, orain arte ere, 60.100 bat euro gorde izan dira; beraz, parra geratzen gara. Uraren %40 galdu ohi da, edo ez da kontrolatzen. Eta hori kontrolatu behar da”. Bestalde, Garratzetik (Miota) Argiñetarako ur-hodi berria (2,5 kilometro) enkante publikoan jarri dutela gogoratu du. Partzuergoak bere gain hartu duen obrak 600.000 eurotik gorako inbertsioa eskatuko du, eta laster hasiko ei dira.