Durangoko EAJren esanetan, inbertsio hori "lehen urrats erabakigarria" da herrian "osasun-zentro moderno eta eraginkorra eraikitzeko, arreta espezializatua Durangaldeko herritarrengana hurbiltzeko", eta pazienteak "beste udalerri batzuetara (Galdakaora, esaterako) joatea saihesteko". Mireia Elkoroiribe bozeramaileak ere ildo beretik egin du berba: proiektua "errealitate bihurtzen" hasi dela adierazi du, eta horrek guztiak durangarrek "historikoki egindako eskaera bati" erantzuten diola gaineratu.
Jeltzaleek iragarri dutenez, Osasun Sailak "datozen asteetan" aurkeztuko du Gaitasun Handiko zentroaren Plan Funtzionala, eta aurkezpen horretan zehaztuko ditu, halaber, "zerbitzuak, eremuak eta espezialitateak". Bestalde, epe motzerako neurriei dagokienez, VIR anbulantzia medikalizatua urtarrilean martxan jartzea gura dute. Zerbitzu horren lizitazioa, hain zuzen ere, martxan dagoela esan du Durangoko EAJk.