Ernai gazte antolakundea Independentziara Egunak antolatzen dabil 75 herri baino gehiagotan. Andu Arrieta eta Maddi Aurtenetxe Ernaiko kideak dira.
Zelan joan dira orain artean egindako Independentziara Egunak?
Maddi Aurtenetxe: Zornotzako eta Zaldibarko Independentziara Egunak oso egokitzat jo ditugu, gazte mordoa batu ginelako.
Andu Arrieta: Aukera ona dira herrietako gazte independentistak batzeko, baita aldarri independentista erdigunean ipintzeko ere. Zapalkuntzarik bako Euskal Herriaren alde gauden gazteon arteko saretze bat egotea ere bada gure asmoa.
M. A.: Ikusten dugu gazteen artean badagoela interes bat independentziari buruz informatzeko, eta gero etorri daitekeenari buruz gogoeta egin gura dugu.
Ernai osasuntsu dago?
M. A.: Durangaldean indar handia dugula esango genuke, eta geroago eta gazte gehiagorengana ailegatzen garela. Geroago eta gazte gehiagok partekatzen dituzte gure ideiak, eta prest daude gure komunitateko kide izateko.
A. A.: Zornotzako Independentziara Egunean jende asko batu zen, eta Ernaik babes bat duela erakutsi zen bertan.
Ernaik 'Gazteon eskutik, independentziara!' antolatu du Berriozarren, apirilaren 17tik 20rako.
A. A.: Topagunea Euskal Herriko hainbat jende batzeko unea da, eta indar erakustaldia egiteko ere bai. Berbaldiak egongo dira, ekitaldiak, eta musika ere bai.
M. A.: Independentziara Egunen dinamika topagunea aurkezteko aprobetxatzen ere bagabiltza, gazteak Berriozarrera joatera animatzeko.
EGITARAUA
DURANGOTIK INDEPENDENTZIARA!
- 17:00etan, hitzaldia, Intxaurren.
- 18:00etan, Topaguneko aurkezpena.
- 19:00etan, luntxa.
- 20:00etan, Sareren mobilizazioa.
- 21:00etan, kontzertuak: Errota erromeria, Txopet eta Totozer MJ.