Balorazio-mahai horiek, orain arte, "udaleko alderdi politiko guztiek eta sindikatu guztiek" osatu izan dituztela azaldu du Herriaren Eskubideak: "Mahaiok era parekidean eratu izan dira orain arte, sindikatuetako 5 ordezkariekin eta alderdi politiko guztietako 5 ordezkarirekin. Erabakietan hitza eta botoa zituen bakoitzak". Alabaina, Herriaren Eskubideak dioenez, gobernu taldeak irizpideak aldatzeko asmoa iragarri du: "EAJk eta PSE-EEk iragarri dute mahai hori sindikatuetako 3 ordezkarik eta udaleko 3 ordezkarik osatuko dutela, eta oposizioko alderdiek ezin izango dutela botorik eman", esan dute.
Talde independentearen iritziz, EAJk eta PSE-EEk "partaidetza mugatzeko beste urrats bat" egin dute, "bozketarik galduko ez dutela ziurtatzeko asmo bakarrarekin".