EAJk eta PSE-EEk osatutako gobernu taldeak 2025erako aurrekontu proposamena aurkeztu die gainontzeko alderdiei. Erakunde autonomoak barne hartzen dituen aurrekontua 45, 7 milioi eurokoa da. "Durangarren ongizatearekin dugun konpromisioa islatzen duen aurrekontua da, enplegua sortzera eta ekonomia dinamizatzera bideratua", Mireia Elkoriribe alkatearen berbetan. "Pertsonak erdigunean jarrita, baliabideak modu eraginkorrean erabiliko direla bermatzen du, horrela bizi-kalitatea hobetzen jarraitzeko".
Aurrekontu "zorrotza" landu dutela argitu du Josune Escota Antolaketa arduradunak. "Diru-sarreren zatirik handiena Udalkutxaren ekarpenetik dator. Ekarpen hori 24,1 milioi euro ingurukoa izan da; iaz baino %3,57 gehiago. Baina, igoera hori nabarmen gutxitu da aurtengo aurrelikidazio negatiboarekin: udalak 893.847 euro itzuli behar dizkio Bizkaiko Aldundiari", azaldu duenez. Gaineratu du gainerako diru-sarrerak egungo lege- eta ekonomia egoerei egokitu direla, "udalerriaren beharrei erantzuten jarraitzeko".
Garatu gura diren proiektuen artean honako hauek nabarmendu dituzte Jesica Ruiz eta Sara Oceja Herritartasun eta Lurralde arduradunek: Tabirako igerilekuetako aldagela berriak egokitzea, Merkatu Plazaren birgaitze eta dinamizazioa, Antso Estegiz kalea eraberritzeko bigarren fasea eta Plateruena berriro martxan jartzea, besteak beste. Argiteria publikoa hobetzeko eta segurtasuna indartzeko ere lotu dituzte diru-partidak.
Merkatu plaza eta Antso Estegiz
Merkatu plazaren birgaitze egitasmoa (304.770 euro) hurrengo urteko udan hasi gura du gobernu taldeak, eta 2026ko udan prest eukiguar dituzteTabirako aldagela berriak. Antso Estegiz kalea berriz urbanizatzeko bigarren faseko lanak (474.667 euro) datorren urtean gauzatuko dira. Trenbideko BEPB proiektuan ere jarraitu gura dute lanean.
Durango Kirolak-en zerbitzuak indartzeko eta kirol azpiegiturak hobetzeko 5.877.503 euro bideratuko dira, eta, kultura eta euskara sustatzeko 4.770.510 euro; euskararen ezagutza eta erabilera sustatzeko 1.168.319 milioi euro gorde ditu udalak. Gizarte Ekintza eta Gizarteratzea sailean, 1.554.521 euroko aurrekontua izango dute (iaz baino %10.21 gehiago), eta, adinekoei arreta ematera 933.179 euro bideratuko dira; iaz baino %24,69 gehiago. Berdintasun sailerako, 506.639 euro lotu dituzte, eta, enplegua eta prestakuntza sustatzeko 465.576 (iaz baino %10,11 gehiago).
Segurtasuna eta udaltzaingoa
Langileen gastuen kapitulua 12,5 milioi eurokoa da (iaz baino %5,20 gehiago). Gainera, segurtasuna hobetzeko helburuagaz Udaltzaingoaren lan taldea handitu gura da, besteak beste. Segurtasunera ia 4 milioi euro bideratuko dira; iaz baino %7,72 gehiago. Herritarren arreta hobetzeko 690.000 euro lotu dira.
Aurrekontu parte hartzaileak
Datorren urteko aurrekontuak herritarren zenbait ekarpen ere batuko ditu: parke berde bat egokitzea (100.000 euro), Tabirako txartel-eremuko argiztapena hobetzea (30.000 euro), gazteentzako musika jaialdia antolatzea (20.000 euro) eta edukiontzi lagunkoiak (50.000 euro) aurrekusi ditu udalak.
Landutako proposamena gaur aurkeztu zaie gainontzeko udal taldeei eta aurrekontua abenduko udalbatzarrean onartzea aurreikusi dute.