Durangoko Udalak beldar izurrite bat atzeman zuen San Fausto auzoko Undatorre eta Zirarmendieta kaleen arteko patio batean. Herritarrei horren berri eman ondoren plaga kontrolatzeko neurriak hartu ziren. Beldarrak produktu ekologiko bat erabiliz tratatu ziren, eta, "horrela, ahalik eta ingurumen-inpaktu txikiena eta egoiliarren osasunerako segurtasuna bermatu ziren", ohar batean azaldu dutenez.
Joan zen barikuan esku-hartu zuen udalak. Asteon izurritea erabat desagerrarazteko beharrezko lanekin jarraituko dute. Herriko berdeguneak eta lorezaintza mantentzeko kontratatutako enpresarekin lankidetzan gauzatuko dira lanok, "egoeraren tratamendu zehatza eta eraginkorra ziurtatuz".